Sabide 16 Otubar 2021, h 17:00

Lino Straulino e Fale Curte in concert

Presentazion dal gnûf CD “MUIART”

Alessandra Cella violin
Bruno Cimenti ghitare
Lino Straulino vôs e ghitare
Lorenzo Bianchi Quota bas eletric
Franco Stocco batarie

Apontament di no pierdi sot da la loze dai Colonos, par sigjilâ Avostanis, cul gnûf progjet musicâl dal grup cjargnel Fale Curte. Nassût tal imprin dai agns Novante par meti in vore un esperiment di crossover, di rock in lenghe furlane, al veve proponût une schirie di concierts cetant frecuentâts, publicant par Nota l’album omonim su compact cassette. La specificitât da la sô propueste artistiche e à tal centri la rileture e l’elaborazion da lis canzons di Lino Straulino, cun rangjaments cetant permeâts da lis sensibilitâts difarentis dai components.
Dopo di une interuzion durade vincj agns, l’ensemble si à tornât a meti dongje tal 2017, tornant a l’ativitât musicâl. Chest gnûf lavôr, intitulât “Muiart” (antiûl o altiûl) e regjistrât in studi par cure di Primigenia Produzioni, al è apene stât publicât su compact disk e online, e al è la risulte di un lunc impegn ch’al è lât indevant par doi agns, tra pandemie e lockdown. I components e àn decidût di continuâ, ancje s’a vevin pierdût Gianni Cattain, chel tal Lui passât al veve pierdude la vite intun incident in montagne e che la sô presince e reste vive tal CD e che ta la sô memorie a continuin l’ativitât.

Program Avostanis 2021