Dulà ch’o sin

Il centri da lʼativitât da lʼAssociazion Culturâl Colonos al è dentri e in dialic cui spazis agricui sugjestîfs che lʼaziende agrituristiche Ai Colonos e à recuperât tal 1992, intestant chest lûc a la memorie da lis personis che achì a àn vivût tra fadiis e miserie, e no invezit ai proprietaris, come chʼal jere simpri sucedût tal passât. Si trate di une testemoneance straordenarie dal mont contadin e colonic, nassude intun sisteme armonic di fabricâts agricui metûts ator di un grant curtîl centrâl, che une volte a jerin stadis stalis, toblâts, dipuesits par imprescj agricui, cjôts, cantinis, ufici pal fatôr e abitazions par lis fameis dai colonos.

Lʼesistence dal fabricât origjinari e je atestade tal regjistri napoleonic dal 1811. Vie pal timp si è svilupade intun complès articolât che, dutun cu la vite agricule che li si faseve, al à vût il so svilup massim tai agns Trente e Cuarante, che dopo insom al à patît un decjadince inesorabil par cause dal “boom” economic dal secont dopovuere.

Dopo di sei stât lassât par une vincjine di agns in dismentie e a la degradazion, chest microcosmi speciâl al è stât recuperât cun amôr, tal rispiet da la sô flusumie, e al è stât puartât ancjemò une volte a une gnove vite mediant procès di rigjenerazion sociâl e culturâl.

Cul timp a lâ al è stât “coltivât” il progjet da la Cort da l’Art che, mediant di une schirie di oparis fatis apueste tai spazi, al fâs vignî fûr, rinovantlu, il spirt dal lûc, intun dialic creatîf e progetuâl jenfri passât e presint.