Cui ch’o sin

LʼAssociazion Culturâl Colonos e je stade metude sù ai 10 di Dicembar dal 1966 cun chê di contribuî a la promozion e al rinovament da lʼidentitât lenghistiche e culturâl dal Friûl in dutis lis sôs espressions. Al è nassût un cantîr permanent in stât di meti in conession la tradizion cu la sperimentazion, la memorie e i valôrs da la civiltât contadine cu la presince cussient tal mont di vuê. Mediant di chest o vin dât vite gnove, dopo di un periodi lunc di bandon e di decjadiment, a un dai complès rurâi plui sugjestîfs dal Friûl di Mieç, dulà che par scuasit doi secui a vevin vivût gjenerazions di colonos.

Il genius loci, a dî lʼanime profonde dal puest, al à ispirât un progjet origjinâl di rigjenerazion dulà chʼa stan insiemit intune maniere otimâl lʼarchiteture tradizionâl, la culture, la dimension ecologjiche, il paisaç rurâl, la culture e lʼart contemporanie, intune atmosfere di convivialitât par merit da la gjestion da lʼAziende Agrituristiche Ai Colonos. Al è dal istât dal 1991 che achì si tegnin events culturâi di gjenars difarents, cunvignis e conferencis, incuintris di poesie, manifestazions e residencis artistichis, produzion di oparis teatrâls, leterariis, musicâls e audiovisivis, cun ancje publicazion di libris e catalics.

Tal 2013 a lʼAssociazion Culturâl Colonos i è stât assegnât a Vicence il Premi Città Impresa “par la sô sensibilitât tai confronts da la culture locâl e soredut par vê interpretât cheste sensibilitât cun formulis artistichis dal dut inovativis. O din chest premi partant par la capacitât di instreçâ la culture furlane cu lis formis culturâls contemporaniis e di cumbinâ in cheste maniere la memorie dal passât e la vision dal avignî.”

Philippe Daverio, grant estimadôr da la realtât dai Colonos, i tignive a definîle “centri di resistence culturâl.”