Joibe 11 Avost 2022, h 21:00

La musine dai cjants

di Lino Straulino

Gnovis cjançons daûr da la tradizion furlane plui antighe
Conference-concert e presentazion dal gnûf libri-CD

Lino Straulino ghitare e vôs
Marisa Scuntaro vôs
Alvise Nodale ghitare e vôs

Par cetant timp o vevi scrit cjançons doprant lis lenghis daûr dai gjenars musicâi storicamentri propis di ognidune: il melodic par talian e il blues par inglês, come ta un manuâl. Ma a un cert pont o vevi capît che nol jere plui acetabil riferîsi dome a modei culturâi di altris culturis par fevelâ di me e dal gno popul. E restave in pîts la cuistion dal furlan, a dî: cuale ise la musiche da la mê lenghe materne? Cualis notis sielzi par scrivi alc che si podedi ricognossi come musiche furlane?
Cuntune ricercje lade indevant par cetancj agns o vevi rimarcât che ta lis vilotis tancj elements melodics si ripetevin intun maniere costant, e biel planc mi soi fat une sorte di mape mentâl par chel ch’al inten cu lis tecnichis di composizion da la musiche tradizionâl furlane. E insom, tacant da l’an passât o ai scomençât a scrivi, tignint come riferiment i criteris ch’o vevi gjavât dal me studi sul cjant popolâr, dant origjine cussì a une stagjon gnove entusiasmant par me, ch’e à dât il risultât in chestis cjançons. (Lino Straulino)

Program Avostanis 2022 _ XXXI