Vinars 30 Lui 1999, h 22:00

Viers il Tiliment e il Friûl

Incuintri par saludâ Renato Rinaldi, in partence viers il Tiliment
Ritmos di tambûrs dal grop di percussions che àn fat un laboratori ai Colonos
direzût dal mestri U.T. Gandhi

Renato Rinaldi al è un zovin atôr e musicist furlan che al lavore al Teatro dell’Elfo di Milan, dulà che il mês di mai passât al à metût in sene “La Nuova Gioventù”, opare multimediâl par furlan za rapresentade in anteprime a Avostanis ’98. Cumò al partìs par un lunc viaç di esplorazion dal flum-simbul dal Friûl: il Tiliment. Par un mês lu traviersarà a piduline di dulà che al nas fin (forsit) a la fôs. Inchest timp al fasarà “esperience di chel che par me al è deventât un lûc imagjinari, un confin di culturis, une tiere di nissun. I confins, ancje s’a son metaforics, si traviersin; jo invezit o cjaminarai dentri di chê fressure che e divît il Friûl in doi, par sintî cemût che di ca e di là dal flum a gambin il Friûl, i furlans e il furlan”.
Al tornarà dongje ai 26 di avost, e sot la loze dai Colonos al contarà la sô aventure.
“Cun chei cuatri stratanìs che mi puartarai davour – un regjistradôr, une machine fotografiche e pôc altri – i cjaparai su muses, peraules e sunôrs, soredut sunôrs, Par me il Tiliment al è il louc da la massime scolte, il louc dolà che las oreles a stan viertes par fuarce, cuasit intun stât di emergiense, i sunôrs a rivin di dutes las bandes, e cu la stesse fuarce a rapissin l’orele…”.

Program Avostanis 1999