Lunis 08 Avost 2016, h 21:00

Human

Film-documentari di Yann Arthus-Bertrand

(2015)

Human al è un progjet grandonon, un fresc grandiôs e introspetîf di storiis e imagjinis dal mont, ch’a dan cont da l’Umanitât ch’o partignìn, e nus proferissin une imersion tal cûr font di ce ch’al vûl dî sei umans.

Cuntun impegn grandon di ducj durât doi agns il regjist Yann Arthus-Bertrand al à fat insiemit cu la sô troupe, dade dongje di vincj gjornaliscj e operadôrs, passe dôs mil intervistis in 60 paîs difarents, fasint a ducj lis stessis domandis, su la vite e sul mont. Ta la fase di montagjo lis testemoneancis di un centenâr di intervistâts, che si corin daûr di presse cun ritmi, a son stadis metudis dongje cun imagjinis di adalt di grant atrat ch’a rapresentin il Planet intune fusion di umanitât e nature.

E cjape vite intal moment istès une sinfonie fate da la musiche da lis tantis e difarentis lenghis origjinâls dai protagoniscj, ch’a vignaran compagnadis dai tescj par talian. Il film al è stât mostrât a l’ONU pal so 70im aniversari.

Pai 25 agns dai Colonos al ven riproponût ta la version scurtade di dôs oris e un cuart.

Program Avostanis 2016