Domenie 21 Fevrâr 2021, h 19:15

Par une piçule storie dal Friûl

Il disorientament da la sugjestion
e la ricercje da l’identitât

Conference di Angelo Floramo
Leturis Fabiano Fantini
Musichis Riccardo Pes

 

Al somee che il Friûl, in fin dai conts, al sedi chest: un intric di frontieris che si metin une disore chê altre e che si tornin a disegnâ une cun chê altre. Frontieris naturalistichis, gjeografichis, lenghistichis, antropologjichis, culturâls e ancje religjosis. Frontieris, no confins. La Storie, purtrop, ta la violence rude di chel che i’nt decrete i destins, e à dispès tirât cjaradoriis e trinceis, e à tirât sù paladis, bastions, mûrs, segnantju cun garetis e fîl spinât, fasintju vuardiâ di oms armâts, spes vignûts di lontan, che no vevin nuie ce fâ cu la storie e la civiltât di chestis tieris. Dulà finivie la tiere dai Ilirics e dulà tacavie chê dai Celts? I castra romans a vuardiavin tieris e a controlavin stradis, dulintor dai lôr “municipia” si son metûts disore chei da lis primis plêfs cristianis lassant che gnovis frontieris a passassin jenfri il Vanzeli e i mîts dai popui paians. E po Patriarcjât di Aquilee e Vignesie, Siôrs di Gurize e Marche trevisane, Ream d’Italie e Imperi Austro-ungaric, Tierç Reich e Republiche sociâl Taliane, Italie e Jugoslavie, la cortine di Fier, vuê ancjemò Slovenie e Carinzie ma tal grim di une Europe ch’e varès di sei unide, tiere e cîl, aghe dolce e aghe salade, montagne e plane, culinis e marsitis. Tropis altris liniis invisibilis varessino ancjemò di sei tiradis? Chestis a son lis domandis che si fâs une storie curte dal Friûl. Jenfri il sbaldiment da la sugjestion e la ricercje da l’identitât.

Program In File 2021