Miercus 09 Avost 2023, h 21:00

Lis mans sui simulacris. Al rivuart dal sacri incorporât

Conference di Gian Paolo Gri e Paola Treppo
Cjants di glesie a la vecje cui Cjantôrs da la Plêf di Guart

︎☔︎ la sere dopo

“Materie sacre”: cussì, dîs agns indaûr, l’antropolic Ugo Fabietti al titulave un biel volum dedicât ai aspiets concrets, fisics, da lis esperiencis religjosis. No dome lis religjons cjaladis tant che complès di cognossincis, dogmis, crodincis, principis morâi e rîts, ma – di là dai coredos strumentâi doprâts ta lis liturgjiis uficiâls – l’insiemi di ogjets, sostancis, vistîts, aliments, lûcs, cuarps e artefats interpretâts cuntun valôr simbolic e trasformâts in ogjets di mediazion cu la sfere dal trassendent; ma, dutune, ancje imprescj di orientament pal rapuart da lis personis cul propri mont. Cuintri e dilà da la dicotononie spirt/materie, alore: par resonâ sui mûts che il sacri al vignive e al ven incorporât e fat part integrant dal se, personâl e comunitari. (Gian Paolo Gri)
Paola Treppo e contarà di cuant che i simulacris a vignivin vistîts e disvistîts. “Lis Madonis di vistî” in Italie a son un teme atratîf di ricercje di chescj timps. E contarà da la sô ricercje, in Friûl, su ce ch’al reste dai antîcs ats feminîi di manutenzion dal sacri.
Gian Paolo Gri al disarà di sostancis e aliments, comprindût il fenomen da la votivitât, cjapâts dentri tal circuit di devozions e pratichis popolârs, dulà che religjon e salût si compenetrein.

Program Avostanis 2023