Domenie 26 Zenâr 2020, h 18:00

Dispatris

Mostre di pituris e incisions di Safet Zec

Dal 26 di Zenâr al 21 di Març 2020
ta la stale dai Colonos, intant dai incuintris In File
+ sabide e domenie da lis h 18:00 a lis h 23:00.

Cu la colaborazion
di Marco Codognotto e Angelo Bertani

Il filosof Hegel, paragonant la storie a un macel, al dîs che “il pinsîr al rive di necessitât a domandâsi a pro di cui, e par cuale finalitât ultime, a sedin stâts fats sacrificis cussì grancj”. Calcolant che dispès, tai ultins doi secui, i maçalizis plui barbars a son stâts fats in non di un popul, che cualchidun si crodeve interpret fûr di discussion, chê domande e devente vuê ancjemò plui conturbant. Impen tal romanç “Vuere e pâs” il protagonist Andrej, sdrumât par tiere e ferît, al scuvierç tal mieç da la batae di Austerlitz il valôr spirituâl dal cîl cence confins, scjavaçât di nûi cidins. Puedino alore lis imagjins di un grant arbul secolâr diu tutelâr di un paîs piçul su lis culinis da la Bosnie, di un toc di pan suntune rustiche taule contadine o fintremai di cualchi patate metude vie par l’unvier riscatâ i oms da la violence vuarbe dai tancj Sarajevo da la storie? L’art dal bosniac Safet Zec nus puarte a crodi di sì. Se o savìn voltâ il nestri voli ai afiets plui vêrs e ai nûi.
(Angelo Bertani)

Preziose testemoneance di un artist bosgnac, ricognossût a nivel internazionâl. Tal 1992 cause la vuere al à scugnût acjampâ dal so paîs, rivant a Udin. Orepresint al vîf e al lavore fra Vignesie, Sarajevo, Paris e Počitelj.

Program In File 2020