Joibe 27 Avost 2020, h 21:00

Une tiere di lôfs, feminis e dius

Un Friûl inedit tai paisaçs naratîfs di Warnefrido, il langobart

Pai 1.300 agns da la nassite di Paolo Diacono

Conference di Angelo Floramo
Leturis di Gianni Nistri
e cjants antîcs ta l’esecuzion di Sandro Bergamo

La Historia Langobardorum al è un test di capacitât evocative grandissime. La sô narazion e zue cu lis sugjestions da la Saghe e dal Mît. E incrose insiemit gjeografiis e sugjestions, nostalgjiis e memoriis. Al displee l’alte Ete di Mieç in Europe che, partint di lontan, i confins glaçâts dal mont iperboreo, si incuintre cu lis vôs dal Mediterani.

Intune glagn narative uniche si dan dongje cussì i acents gjermanics, sclâfs e romançs ch’a rimbalcin tra lis cjartis di cheste font storiche ecezionâl, proferint un nît degn a cheste nestre tiere, chel Friûl che bielzà pai voi di Pauli Diacun al deventave une sintesi di animis dome in aparince lontanis e difarentis tra di lôr. La serade e ûl sei une perlustrazion magjiche e incjantade di chês maraveis ch’a deventarin cjant e conte, ma ancje resistence braurose cuintri dai tentatîfs di omologazion comandâts da la cort imperiâl caroline, cirint di cjapâ sù fruçons mancul cognossûts: no chei ch’a tornin indaûr la grandece di un popul, ma lis sclesis dulà che si po ancjemò imprisonâ il revoc dai siei siums.

Se al plûf: 8 di Setembar

Program Avostanis 2020