Domenie 04 Març 2012, h 17:00

Par amôr di … matrie

Resistencis lenghistichis feminîls tal venteni fassist

Incuintri cun Boris Pahor

Tai boscs, in cjasâi spierdûts, plui in là dal paîs, lontan dal voli di control dal regjim fassist, maris, fiis e sûr a continuarin par vincj agns a combati la lôr batae eroiche cuintri di une ditature cjadocje e violente, che e dineave ai popui sot di lôr ogni libertât, ancje chê primarole, chê dentri tal nestri sanc e dentri ta la tiere, a dî di podê fevelâ par sloven, inta la lenghe da lis nestris maris. E a son stadis partant lis feminis lis protagonistis di cheste resistence lenghistiche. Partigjanis che a colps di vocabolaris, sparant svintuladis di peraulis, cjants, contis, armadis cul abecedari, a inventarin scuelis clandestinis par che i lôr fîs e i lôr fradis a no dismenteassin che propit mediant da la peraule vive e cussient si inlidrise la libertât di un popul. Boris Pahor, testemoni straordenari dal Nufcent e dai siei dramis, al à simpri marcât ta la sô scriture l’impuartance da la femine su cheste strade dificil e intorteade di redenzion dal om dai leams e da lis pastoriis da la crudeltât e da la alienazion da la ditature.

Program In File 2012