Vinars 15 Març 2019, h 20:30

O sin dal gjat

Presentazion dal libri di William Cisilino

A intevegnin l’autôr e il scritôr Walter Tomada

Disens dal vîf di Daniel Cuello

Incursions di Claudio Moretti

Ogni domenie sul cuotidian “Messaggero Veneto” e ven publicade “La peraule di setemane”, une rubriche par cure di William Cisilino che e conte in marilenghe un fat sucedût dilunc de setemane in Friûl partint de peraule furlane che lu caraterize.

Vie pe serade al sarà presentât in forme vivarose e divertente il libri “O sin dal gjat” che al met adun une prime grampe di peraulis buinis di contânus il Friûl di vuê cuntune vene ironiche e un piç di poesie, ancje in graciis des ilustrazions origjinâls di Daniel Cuello.

“O consei pardabon la leture di chest libri – al à scrit inte Presentazion Flavio Santi – parcè che al sa jessi, tal stes timp: dizionari (al è dividût par vôs); anuari (al met da pît lis datis); romanç (al conte par cjapitui curts une storie che ti cjape dentri); saç (al analize e al interprete fats); racuelte di aforisims (al da definizions e stocadis fulminantis); livre de poche (al sta cence fastidis intune sachete e al è l’ideâl par frontâ lis zornadis dificilis)”.

Program In File 2019