Vinars 06 Setembar 2024, h 18:00

O ricuardarai cui ch’o soi: Aquilee e il futûr da la memorie

Sale consiliâr dal Comun di Aquilee

Presentazion dal gnûf libri di Gabriele Pelizzari (progjet Colonos)
Alessio Persic e Emiliano Fiori a dialoghin cul autôr

Dismenteâ cui ch’o sin al ûl dî no podê nancje imagjinâ ce che o podaressin e o podarìn jessi: par chest la memorie no je cronache sierade, ma principi dinamic di vite e di potenziâl, parcè che jê e je funzion dal presint e supuest dal avignî.
Ta l’ete dal avignî realizât, dal progrès acelerât, dal presint curt, cjalâ indaûr al passât al ven dispès calcolât un zûc inutil di curiositât o, al massim, un esercizi di difese caritatevul. Stant che si sintin in ritart su ce che bielzà al è daûr a sucedi e dal sigûr al vignarà a sei, spindi timp par ricuardâ ce ch’al è stât nus somee un’altre, imperdonabil esitazion ta la rincorse dal nestri “potenziâl di novitât”.
Il storic e espert di cristianisim antîc Gabriele Pelizzari, dopo da la esperience iluminant dal an passât par la cognossince dal patrimoni conservât ta la Basiliche di Aquilee, al torne par la presentazion di cheste gnove publicazion, ch’e insiore il catalic dai Colonos. Si capirà cetant che Aquilee e sedi il paradigme perfet di un ideâl da la memorie alt, necessari e, tal stes timp, fragjil e di tratâ cun cure. La tradizion aquileiese e à dibisugne di sei difindude, di jessi metude tal centri di un progjet di avignî dulà che i si domandedi di mostrâ l’orizont dal pussibil. E dal miôr.

Program Avostanis 2024