Sabide 10 Avost 2024, h 21:00

De profundis. Pre Toni Beline e Oscar Wilde

Live-book di e cun Martina Delpiccolo e Fabiano Fantini

☂ la sere dopo

Vincj agns indaûr, tal 2004, al vignive fûr par furlan “De profundis” di pre Antoni Beline, par cure da l’Associazion Culturâl Glesie Furlane, che chest an e fâs 50 agns. Un libri autobiografic, introspetîf, su la soference par cause da la dialisi, ch’e divente une riflession sui temis universâi: il mâl, fisic e morâl, il dolôr, la pôre, la sperance.
Tal 1905, scuasit un secul prime da la publicazion di pre Beline, al vignive fûr postum, da lis stampis londinesis, “De profundis” di Oscar Wilde. Une lungje letare scrite tal 1897 da la preson dulà che si cjatave pal reât di sodomie, indirizade al so zovin amât, che nus disvele il mont interiôr dal autôr, no mistificât.
Intrigant dal ponte di viste leterari e uman il colegament tra lis dôs oparis: “istintîf” e “ocasionâl”, come ch’al sugjerìs pre Toni, nus rive vuê cuntune fuarce gnove e atuâl.
Martina Delpiccolo e Fabiano Fantini a metin dongje i doi “de profundis” intun live-book, il format teatrâl che lôr a àn ideât, dulà che lis oparis si fasin “vivis”: un reading ch’al instrece leturis senichis, recitazion, coments e clâfs interpretativis.

Program Avostanis 2024