Lunis 19 Avost 2024, h 21:00

Il cjant necessari

Ricuardant Giovanna Marini

Cun Angelo Battel, Gualtiero Bertelli, Mario Brandolin, Vanni Floreani, Michele Gazich, Laura Giavon, Coro La Tela, Tania Pividori, Massimo Somaglino

Par cure di Valter Colle

☂ la sere dopo

Giovanna Marini e je stade une figure centrâl ta la culture taliane dai ultins sessante agns. Formazion classiche, vignude sù di une famee di compositôrs, prime diplomade taliane di ghitare, perfezionament cun Segovia, tai prins agns ’60 e cognòs la cjançon popolâr. Dopo di jessi stade une colone puartant dal Nuovo Canzoniere Italiano, e puarte indevant l’impegn musicâl svilupant parie un so stîl inconfondibil che la puarte a scrivi gnovis baladis contemporaniis.
Da la seconde metât dai agns ’70 e svilupe la forme da la “Cantata”, spetacul di narazion che pa la plui part e condivît cuntun cuartet vocâl feminîl scrivint pagjinis insuperadis di musiche contemporanie che e pescje di plante fûr tal mont da la tradizion orâl. Didate straordenarie, e insegne ta la Universitât di Parîs e ta la scuele popolâr di musiche di Testaccio a Rome. E da dongje une vaste schirie di musiciscj e cjantants e risulte riferiment insoprimibil par gran part da la musiche di autôr taliane.
Frecuents e feconts i rapuarts cul Friûl tacant dal incuintri cun Pier Paolo Pasolini e la scuvierte da la lenghe furlane che jê e decline dispès in musiche. Fondamentâl il so contribût ta la realizazion dai “Turcs tal Friùl”, tape miliâr dal teatri no dome furlan.
I Colonos, che l’àn za ospitade tal 2012, i dedichin un omaç midiant da la partecipazion di chei che l’àn cognossude e a àn lavorât cun jê. Da lis primis esperiencis dai agns ’60 a la indimenticabil esperience dai “Turcs”.

Program Avostanis 2024