Domenie 05 Fevrâr 2023, h 19:00

De Saporibus: la culture parecjade

Afabulazion culinarie cun degustazion

par cure di Angelo Floramo
cul ostîr Fabio Gasparini e la coghe Paola Moreale

Event risiervât ai socis, cun prenotazion su Eventbrite
Partecipazion 35 €

In colaborazion cu l’Ostarie di Bic

La cusine e je un laboratori privilegjât di savês (e alore ancje di savôrs) ch’a vegnin di lontan a definî rapresentazions dai cuatri cjantons dal mont, sugjestions, rîts e crodincis ch’a finissin simpri dentri intun plat. E cussì o vin decidût di “cuei la culture”, metint dongje une taulade ch’e trasformarà i Colonos intun “cenacul” sapiençâl dulà che la cercje e cjaparà il puest da la ricercje, permetint ai ospits di gustâ la cognossince e di saceâ la lôr curiositât. Si tacarà di un antîc ricetari dal XII secul ch’al jere stât di Guarnerio d’Artegna, scrit in lenghe arabe di un Ebreo intune scuele islamiche di Tunisi e voltât par latin di un munic cristian. Lis sôs ricetis, riviodudis par l’ocasion da la maestrie dal ostîr Fabio Gasparini insieme cun Paola Moreale dal Agriturisim Ai Colonos, a vignaran cuinçadis da lis torototeladis di Agnul Floramo, che il so compit al sarà chel di dimostrâ che il sugo da la cognossince nol magle, anzit al nobilite. In sumis, bocje ce ûstu!

Program In File 2023