Joibe 23 Març 2023, h 20:45

Cul futûr sot da lis ceis

Seconde part

Cjase de zoventût – Lavarian

Presentazion e proiezion da la video-inchieste
cu la colaborazion da la Consulte zovins dal comun di Mortean

Intervistis par cure di Angelo Floramo e Martina Delpiccolo
Regjie di Paolo Comuzzi
Coordenament di Federico Rossi

Progjet Colonos

Se l’anime malcuiete di Pier Paolo Pasolini e ves peregrinât ator tra lis perifariis e i borcs dal nestri Friûl, al sarès dal sigûr tornât a cjapâ in man cineprese e microfon par investigâ i siums, lis insigurecis, ma ancje lis rabiis e lis utopiis di chê gjenerazion che i grancj, a marchin cun altris nons: millenial, digitarian, zeta. Tal spirt dal poete di Cjasarse, i Colonos a àn invecit pensât di dâur vôs, cence filtris, a chês frutatis e a chei frutats che la societât dai grancj no scolte plui.
Cuntun tai a metât strade tra inchieste e scandai antropologjic, instreçant il spirt dal “Sogno di una cosa” e di “Comizi d’amore”, i doi intervistadôrs a àn cjapât sù une galarie vivarose di cent testemoneancis par un totâl di 25 oris di regjistrazion video, ch’a vegnin condensadis intun documentari di dôs oris, struturât in dôs parts. O scuvierzarìn propit di lôr, i erêts da la Tiere, visions sorprendintis dal mont e da la vite.

Program In File 2023