Domenie 08 Setembar 2024, h 08:00

A brene vierte

Gare artistiche, par cure di Michele Bazzana

h 8.00 E scomence l’aventure
h 17.30 Jurie popolâr e premiazion

Brindis finâl cun degustazion di vins proferide da la Cantine Bulfon di Valerian (Pinçan)

event anulât cause il brut timp

E torne cu la cuinte edizion la gare artistiche cun ritmi bienâl ch’e met in relazion artiscj di difarent estrazion e provenience, organizâts in sîs scuadris, che si metin in zûc par creâ ognidune une opare-instalazion tai spazis dai Colonos. Di matine buinore al tart dopomisdì, materiâi di scart, robe di ogni gjenar come fier, lens, cartons, plastiche, tiessûts e dut ce che si calcole zaromai che no si po doprâ plui, a deventin element par cambiaments demiurgjics cun plui mans ch’a dan forme al teme che ur vignarà comunicât ai concorints dome cuant che la gare a tacarà.
Fantasie, creativitât, vision, interazion ludiche par dâ un valôr a ce che plui no ‘nd à, dâ gnove vite a materiâi ch’a patissin di muart aparint o evident. E je cheste l’esperience di une trasformazion artistiche che si cjatarà insom il judizi insindacabil dal public, che al darà la sô preference mediant di schedis apueste di votazion. A la scuadre ch’e vinç ur vignarà ufiert un gjenuin prodot agrialimentâr furlan.

Program Avostanis 2024