Domenie 25 Avost 2024, h 16:30

La vere storie di Glesie furlane

Zui – Plêf di San Pieri

50 agns di testemoneance tai ricuarts di Pre Romano Michelot
intune conversazion cun Federico Rossi
Cjants religjôs a la vecje cu la Corâl Rôsas di mont

Dutun cu l’Associazion Glesie furlane APS
In colaborazion cu La Patrie dal Friûl

La lungje marce di Glesie Furlane e je començade ai 28 di Avost dal 1974, 50 agns indaûr. Une presince costant tal ambit eclesiastic, culturâl e sociâl dal nestri Friûl. E nas par un fat emblematic e di contrast cu la jerarchie da la Glesie, intant di un incuintri cui predis da la Cjargne ta la plêf di San Pieri a Zui. Si domande di celebrâ in lenghe furlane la messe conclusive, ma i vescui Battisti e Pizzoni a rispuindin di no. Un grup di predis, lassant un document sul altâr maiôr, al jes duncje di glesie come segn di proteste, lassant scaturîts i vescui. Al è chest il prin at di une lungje controversie, su la linie dal Concili Vatican II, par podê coltâ la fede e il Vanzeli ta la culture, ta la storie e ta la vite dal popul furlan.
Chescj prins cincuante agns a son stâts impegnâts cun costance e coerence par la traduzion da la Bibie e dal Messâl che, in mût vergognôs, al spiete ancjemò un ricognossiment. A son cetantis lis azions che a son stadis inviadis fin cumò: publicazion di libris, cd, documentaris, incuintris di ogni fate a pro dal ricognossiment dal Credo cristian secont il sintî furlan. Une batae no ancjemò vinçude, ma dal sigûr nancje pierdude.

Program Avostanis 2024