Martars 04 Avost 2020, h 21:00

Laudato si’

Leture seniche da l’encicliche di Pape Francesc

Cun Massimo Somaglino, Aida Taliente e Patrick Platolino

Intervents musicâi Riccardo Pes (violoncel)
Direzion artistiche Massimo Somaglino
Traduzion furlane Gotart Mitri e Federico Rossi

Nol dîs robis mai sintudis prime, Pape Francesc, in cheste sô encicliche dramatiche dal 2015. Tantis altris vôs a dan dongje il stes cjant, e di cetant timp: a son lis vôs dai sienziâts, dai climatolics, dai rivoluzionaris, dai crodints vêrs, dai artiscj, parcè no? e di tancj altris. Ma ve che Pape Francesc al pant une veretât semplice e ancjetant conturbant: chestis vôs a son par solit cence scolte. Cussì la plui alte autoritât morâl dal mont e cjape incaric di ripiâlis sù. Forsit se chês robis lis dîs lui, finalmentri chel ch’al à di scoltâlis, lis scoltarà. E cussì il cjant di Pape Francesc al è chel di un solist che al amplifiche il bordon dal coro, che come ta la tragjedie greghe al è coro di vielis, di fruts, di feminis, di emargjinâts, di periferics. Al è un cjant ch’al è ancje un berli, un anunci, un amoniment ch’al fevele di responsabilitât, di partignince, di justizie, di bielece, di sobrietât, di relazion, di rispiet, di cambiament. Ma il dubi al reste: chel ch’al à di scoltâ, scoltaraial? (m.s.)

Se al plûf, 6 di Avost.

Program Avostanis 2020