Martars 18 Avost 2009, h 21:00

Vivi achì

Al presente Angelo Bertani

Francesco Ursella al lei “Savoltament gjenerâl” di Pre Toni Beline

Concert di cjampanis cui scampanotadôrs da l’Associazion “Scampanotadôrs furlans – Gino Ermacora”, in colaborazion e cul sostegn da la dite SIMET

“Vivi achì” al è un progjet nassût tal ambit dal percors laboratoriâl “Insiums / progjet utopie” che al è lât indenant tal sît dai Colonos tai agns 2007 e 2008.
La sô fonde e je intun lavôr di ricercje su materiâl fotografic tirât fûr dai albums di famee da la int di Vilecjasse, cul intendo di dâ dongje secuencis di imagjinis che a rivedin adore di traviersâ e scancarâ lis dimensions dal timp e che, rindint visibil a un voli “esterni” ce che par solit al è patrimoni dome di une famee, a podedin meti in vore un mecanisim di riflession e di confront sul passât, sul presint e sul futûr di dute la comunitât.
Trê lûcs cun trê nivei di fruizion difarents a ospitaran chest lavôr: il vecjo granâr dai Colonos, dulà che e vignarà inmaneade une mostre da lis secuencis fotografichis vierte al public; i mûrs dal paîs dulà che a vignaran picjâts manifescj che a podaran viodi ducj chei che a passaran di li; e il dentri da lis cjasis di Vilecjasse, che daûr dai nestris intindiments a varessin di ospitâ une imagjine che e rive di une altre famee e une altre cjase, in chest câs cuntune fruizion pardabon privade ma in cualchi maniere vierte a la ri-circolazion da la idee che chest progjet al môf.

La mostre tal granâr e je vierte ta lis seradis di Avostanis, fin ai 8 di Setembar

Program Avostanis 2009