Joibe 10 Avost 2017, h 21:00

Kebar Krossè – II PART

Leture seniche dal romanç di Stefano Moratto

Par cure di Massimo Somaglino

Cun Massimo Somaglino, Marta Riservato e Elvio Scruzzi

Musichis Vittorio Vella (tastieris e complements sonôrs) e Mirko Cisilino (trombe)

Kebar Krossè, un dai romançs plui intrigants da la narative contemporanie par furlan, ch’al è stât publicât di pôc, al conte, cuntune lenghe sperimentâl, di une citât sierade, cenglade di un desert indecifrabil e mortâl. Une citât che no à plui domandis di fâ, che e va al mancul cidine, un pôc in dì, te indiference di ducj. I residents a passin il timp jenfri lavôrs che no àn nissun sens, ma codificâts par fîl e par pont e intune sorte di ostariis, clamadis “primarolis”, dulà che si incjochin cui “papots”, ven a stâi cun bevarons torgui che si struchin tai reparts alimentârs dulà che si prepare il mangjâ (e ce mangjâ!) par ducj. Protagonist al è Montàg (cun riferiment dret a Fahrenheit 451 di Ray Bradbury) che, a diference dai altris, al sint “il nuie” che al sburte dapardut e che lu stice a fâsi domandis. Il so cirî rispuestis lu puartarà a cognossi Mamì Manamà, la sflandorose, a jentrâ dentri la “Cengle Nord Est” (la favela ai cunfins urbans) e a scuvierzi che il “nuie” dal desert, no dome nol cope, ma al pues sei une pussibilitât. Pussibilitât che, la citât, no à plui.

Program Avostanis 2017