Lunis 07 Avost 2017, h 21:00

Kebar Krossè – I PART

Leture seniche dal romanç di Stefano Moratto

Par cure di Massimo Somaglino

Cun Massimo Somaglino, Fabiano Fantini e Elvio Scruzzi

Musichis Vittorio Vella (tastieris e complements sonôrs) e Denis Biason (ghitare)

La citât di Udin (parcè che e je jê) imagjinade di Stiefin Morat pal divignî no lasse pensâ nuie di bon, par nô e pai nestris fîs…. Un lûc e un timp di vê pôre….. Un puest brut. No un fregul di vert, un sfantâsi di mûrs e di int, dulà che soredut si mangje mâl (cetant mâl si lu scuvierzarà) e si bêf piês. Une vite no degne. Ancje lavorâ: rompi vues par comedâ vues. Dut lavorâ di bant. E no stin nancje a fevelâ da la periferie, che dopo e sarès chê che ustinâts o continuìn a clamâ “La Patrie dal Friûl”, ma che o fasaressin miôr a tacâ a usâsi a clamâ “nuje di là da la cengle”. Al fâs pore, il nuie, si sa….. Ma se un scritôr (par solit i scritôrs a viodin robis che nô no rivìn ancjemò a viodi) si invente une robe cussì, e al ribalte di plantefûr l’idee di citât (e di tiere) salde e cidinose, nete e oneste, lavoradore e ordenade che nus fâs stâ cetant trancuîi, alore bisugne vosâ, sigâ, a vôs fuarte, dâ l’alarm, ancjemò prime di capî ben parcé, come lis marmotis su pai crets, visâ la int di stâ in uaite, che i butui dal miluçâr a son daûr a sparî….
Par fâlu naturalmentri a coventin atôrs e musiciscj. Ve chi ch’a son.
– Massimo Somaglino

Program Avostanis 2017