Domenie 06 Fevrâr 2005, h 17:00

Imersions emersions

Incuintri cui artiscj Sergio Scabar e Nicola Toffolini

Lis concezions artistichis di Sergio Scabar e Nicola Toffolini a son difarentis, ma insom dutis dôs a deventin complementârs tal lôr mût di tratâ la complessitât dal presint.
Scabar al met in pose chês piçulis robis che lis veve une vore a cjâr tante art dal Nüfcent, ancje se no si savarès di ben se si infondin ta la scuretât o se a vegnin a flôr tal neri alchemic da lis sôs fotografiis calibradis al massim. In veretât l’artist, utilizant ogjets di ogni dì e tecnichis antighis cui sai d’arint, al intint di evocâ sot dai nestris vôi chê che o podaressin definî la linie di confin cetant sutile dulà che il presint al devente passât e il passât al devente presint.
Toffolini, al contrari, al somee dut proietât ta la imaginazion dal avignî. I siei lavôrs tridimensionâi a son la risulte di progjets unevore rigorôs, a doprin ad implen la tecnologjie, a evolvin come che a fossin i diviers stadis di une ricercje uniche e puntiliose intor di un rapuart futuribil jenfri artificiâl e naturâl. Ma distès, sot vie, in chestis oparis-progjet e ven fûr simpri l’intenzion ironiche, tant che tal ultin al è evident che la forme tecnologjiche e je dome che un stratagem da l’art par afermâ ancjemò une volte la sô libertât a front di ogni determinisim che al scjafoie.
(Angelo Bertani)

Program In File 2005