Il prin apontament culturâl online dai Colonos al è partît in direte streaming su facebook ai 10 di Mai dal 2020 cuntune declamazion conturbant di Agnul Floramo, intitulade “Pieri Budiel”. Dal sigûr altris a vignaràn daûr. Il slungjâsi da la pandemie, dutune cul isolament sociâl e la sierade dai puescj da la culture e da l’art, al vierç senaris gnûfs. E al sugjerìs gnovis sfidis tal fâ culture, che a sticin la capacitât di sperimentâ lis potenzialitâts proferidis da lis tecnologjiis informatichis: un orizont che cumò al ven imponût da l’emergjence, ma che la sô prospetive in avignî e sarà chê di modei di simbiosi â jenfri la comunicazion digjitâl e l’esperience vive da la culture, che li dai Colonos e je marcade di une comunitât reâl, fisiche, cun intensis relazions umanis e sociâls.