Domenie 04 Dicembar 2011, h 17:00

Mostre fotografiche di Sergio Scabar

Domenie 4 di dicembar a cinc dopomisdì
Museu Etnografic dal Friûl
Palaç Giacomelli, in Borc di Grazzan 2 a Udin

La fotografie di Sergio Scabar e je une fotografie di ogjets e in cheste ocasion particolâr e jentre tune relazion suturne ma elocuent cui ogjets che a son conservâts tal Museu Etnografic dal Friûl. Il rapuart che lis imagjinis elaboradis dal artist gurizan a intindin di imbastî cui documents da la culture materiâl furlane nol è di stamp ilustratîf ni descritîf, ma pluitost analogjic e metaforic: l’intindiment al è chel di fâ saltâ fûr l’oportunitât di une riflession di plui sul significât plui autentic dai ogjets in mostre e parimentri sul chel dai ogjets rapresentâts intune relazion strente, e dal dut necessarie, fra passât e presint, fra storicizazion e urgjience da la contemporaneitât.
Lis fotografiis di Scabar, elaboradis su nivei bas e profonts in gracie da lis tecnichis rafinadis di svilup e di stampe che lis rindin unichis, a jentrin cun discrezion jenfri i materiâi in esposizion, e si mimetizin biel a pueste tal contest. E sarà une vore dal visitadôr atent chê di scuvierzi sale dopo sale e soredut ricognossi in ognidune un invît a lâ insot, di là di ogni aparince, rivant a viodi oltri il limit minimâl da la percezion e rifletint sul sbrissâ vie dal timp e di tantis esistencis che propi tai ogjets plui modescj e plui amâts a àn lassade la olme da lis lôr strussiis, dai lôr afiets e dai lôr insiums. Dut chest nol è dal sigûr tal segn di une nostalgjie acritiche e sentimentalistiche, ben pluitost ta la consapevolece che l’art e à sens propit parce che nus ufrìs une ocasion par capî miôr la vite.
– Angelo Bertani

SERGIO SCABAR

Sergio Scabar al è nassût tal 1946 a Ronchi dei Legionari (Gurize), dulà che al vîf e al lavore. Al à tacât a interessâsi di fotografie ancjemò dal 1964. Dal 1966 al 1974 al à partecipât a diviers concors nazionâi e internazionâi doprant la fotografie soredut cu la finalitât di conte e di reportage.
Po dopo, tai agns ’80, la sô ricercje e à fat une svolte, par vie che la figure umane e je sparide ta lis sôs oparis e il so interes si è concentrât su la nature e la concetualitât.
Cu la vore “Il teatro delle cose” tal 1996 al à scomençât a praticâ un gjenar di stampe alchemiche cui sâi di arint “esemplâr unic”. La maniere di lavorâ, une vore particolâr e tarade su nivei bas, e emerç ancjemò di plui in confront a lis oparis precedentis: al jentre il contat cui materiâi, l’imparonâsi cui metodis, cu la meticolositât e cui timps dal lavôr artigjanâl, utilizant rapuarts chimics e sensoriâi, metûts adun ta la ricercje da la essence da la creativitât.
Tal 2003 il CRAF i à dât il Premi “Friuli Venezia Giulia Fotografia”.
Tal 2008 al è stât publicât il volum “Silenzio di luce “ (Marte Edizioni) e tal 2010 l’associazion culturâl Colonos e à publicât il libri “Cidinôrs”, cun tescj trilengâi par furlan, talian e inglês.

MOSTRIS PLUI IMPUARTANTIS

1978 Galleria Forum Trieste, 1979 Galleria Nuovo Spazio2 Vignesie, Incontri Internazionali di Fotografia Prato coll., 1985 Galleria Plurima Udin, 1986 Circolo Filologico Milan coll., 1990 Galleria Exit Gurize, 1998 Arte Studio Clocchiatti Udin coll., “Oggetti del desiderio – Natura morta” Palazzo Costanzi Triest coll., Studio d’Arte Bassanese Trieste. Rassegna Libro d’Artista Grisignana (HR) coll., 1999 “Bel Tempo – Fine Weather” Ludwig Museum Budapest (H) coll., Studio d’Arte Clocchiatti Udin, Didivuè Associazion Colonos Vilecjasse di Lestize (UD) coll., 1999 Centro d’Arte Grigoletti Pordenon, 2000 Galleria Nuova Artesegno Udin, 2002 Juliet –Parco Foundation Casier (TV), 2003 “Trieste una città sospesa” Graz (A) coll., Palazzo Frisacco Tumieç (UD), Villa Ciani Lestàns (PN), Galleria Juliet Triest, 2004 Galleria La Roggia Pordenon, Galleria D’Arte Contemporanea Spazzapan Gradiscje d’Isonç (GO), 2005 Galleria Lipanje Puntin Triest, par cure di Philippe Daverio “Tempo Fermo” Castello di Grumello (BG), “Primaluce” Mostra Internazionale di fotografia Ancona coll., “Un monde non –objectif en photographie” II Galleria Thessa Hoerold Parigi coll., a cura di Philippe Daverio “57° Premio Michetti Laboratorio Italia” Francavilla al Mare coll., “In Hoc Signo La Croce nella fotografia” Pordenon coll., 2006 Photo Art Gallery La Batana Rovigno (HR), 2007 Arte Studio Clocchiatti Udin, Associazione Culturale Acanto Bertinoro (FC), Biblioteca Statale Isontina Gurize, 2008 Galleria Lipanje Puntin Rome, Centro Arti Visive “La Castella” Motta di Livenza (TV), Biennale di Alessandria “Shapes of Time” Alessandria coll., 2009 “Kaleidoscope d’Italie” Centre d’Art Dominique Lang Dudelange (L) coll., a cura di Peter Weiermair “Nella luce di Morandi” Galleria Goethe Bolzan coll., 2010 “Cidinôrs” a San Vît al Tiliment par Avostanis e par cure da l’associazion culturâl Colonos.

I Events 2011