Vinars 04 Avost 2017, h 21:00

Cartons animâts

Inaugurazion – in mostre lis oparis dal laboratori direzût di Chris Gilmour

Intervents di
Donatella Nonino, responsabile dal progjet
Vania Gransinigh, conservadore di Casa Cavazzini
Angelo Bertani, curadôr artistic dai Colonos

Performance teatrâl di Teatrarum, regjie di Tullia De Cecco

Mostre vierte ta lis seradis di Avostanis, fin ai 4 di Setembar

Par cure di Cooperativa Duemilauno Agenzia Sociale e “L’arte non mente”, in colaborazion cul Dipartiment di Salût mentâl di Udin, e cul Museu di Art Moderne e contemporanie Casa Cavazzini dal Comun di Udin

Protagonist dal progjet “L’arte non mente” al è un grup di personis adotadis dai servizis dal Dipartiment di salût mentâl di Udin, ch’a partecipin in forme ative a esperiencis laboratoriâls di creazion artistiche, artigjanâl e culturâl. La fonde e je tal valôr primari di une comunitât che, ta la sô dimension istituzionâl e ancje sociâl, no refude ma si cjape cure da lis personis svantazadis cun strategjis di condivision ch’a àn la fonde ta la centralitât da la persone, e ta l’instaurazion di relazions umanis e sociâls ch’a favorissin la cressite coletive.

Ta la vierte dal 2016 une ventine di aspirants artiscj a àn metût in vore tal museu Casa Cavazzini une oficine creative cu la direzion di un grant mestri: l’inglês-furlan Chris Gilmour, artist cognossût ator par l’Europe e tai Stâts Unîts, che la carateristiche dal so lavôr e je chê di realizâ sculturis ch’a riprodusin ogjets di ogni dì in misure reâl, doprant dome carton di scart e cole. Cu la stesse tecniche i arlêfs a àn dade forme a lis fantasimis e adiriture ai mostris dal lôr imagjinari, fasint esisti une sdrume di personaçs che cumò a rivin ancje ai Colonos a testemoneâ la lôr (r)esistence cuintri da l’implosion.

Program Avostanis 2017